yeni xəbərlər

Elə gözəl qar yağır

Yanvar 18th, 2018 | by DAK.AZ
Elə gözəl qar yağır
DAK
0

Elə gözəl qar yagır qış da yadımdan çıxır,
Bu bəyaz burulğanda yaş da yadımdan çıxır…
Ələnir lopa-lopa, iri, yorğanparası,
Göydən milyon göz yağır,- görünməzdir qarası.
Ağappaq paraşütlər-Tanrının desantları,
Çapır göydən yerəcən buludun ağ atları.
Qonmağa yer axtarır körpəcə Qu quşları,
Toxunur ağ xalıya ulduzlu naxışları.
Milyon əriş çəkilir göy üzündən yerəcən,
Bu bəyaz parçasını hamıyla bölənəcən.
Yüz qayçı itilənsin bu ağ ipləri kəsməz,
Əlim ağ vərəqləri çevirməyə tələsməz…
İşləyir gecə-gündüz səssiz qar dəyirmanı,
Soyuq yorğan altında isinir yerin canı.
Bu ilahi təmizlik xatırladır nələri?
Anamın gözlərində yuva qurmuş kədəri.
Əridib üfüqləri alovlu nəfəsiylə
Ağ çiçəkli bağlardan boy göstərən səhəri.
Ağ simlərdə çalınır ən qəmli mahnılarım.
Qədərlə barışığım, kül olmuş arzularım.
Niyə donub qalmışam, nəyə qarışıb başım,
Qoy gedib səs-səmirsiz bu ağlığa qarışım…

Sabir Rüstəmxanlı

Şərh yeri

şərh

Share Button

Comments are closed.