Həm özü mətbuatda formalaşan, həm də mətbuatın zamana görə formalaşmasında xidməti olan ziyalılardan biri də Şərif Kərimlidir. O, hər vaxt təmənnasız çalışıb, iddiadan çox, səmimi ictimai vətəndaş töhfəsinə üstünlük verib.
Şərif Kərimli 1954-cü ilin iyununda ulu Borçalıda doğulub, 1977-ci ildə BDU-nun jurnalistika fakültəsini bitirib. 47 ildir ki, mətbuatda çalışır. Tələbəliyində Tanrı lütfü ilə ustad müəllimlərdən dərs aldığı kimi, jurnalistikada da Əjdər Xanbabayev, Məmməd İsmayıl, Sabir Rüstəmxanlı kimi ünlü sənətkarlardan öyrənib.
Müstəqillik mücadiləsi dövründə ilk müstəqil mətbuat orqanı olan “Azərbaycan” qəzetində məsul katib, baş redaktor müavini olub. 1992-ci ildə bu qəzet 31 nəfər jurnalistin Milli Məclisə ünvanladığı məktub əsasında cümhuriyyət dövrünün parlament orqanı olan “Azərbaycan” qəzetinin hüquqi varisi olaraq fəaliyyətə başlayıb və Şərif müəllim orada baş redaktor vəzifəsini tutub.
90-cı illərin önlərində ən böyük acımız Qarabağa və Qərbi Azərbaycanda torpaqlarımıza və soydaşlarımıza qarşı erməni təcavüzünün baş qaldırması idi. Bir yandan da Gürcüstanda Qamsaxurdiya dövründə tarixi saxtalaşdırmaq cəhdləri, Borçalıda soydaşlarımızın hüquq və azadlıqlarına sayğısızlıq, milli ayrı-seçkilik özünü göstərirdi. Şərif Kərimli belə bir ziddiyyətli zamanda “Azərbaycan”da qələmdaşları ilə birlikdə əsgər əhval-ruhiyyəsində çalışırdı. Tez-tez qaynar nöqtələrdən reportajlar, ictimai diskussiyalar hazırlayırdı. Qəzetdə Sabir Rüstəmxanlının atdığı irəliçi, demokratik təməl sonradan Şərif Kərimlinin redaktorluğunda özünəməxsus şəkildə davam elədi. Qəzet nəinki günün nəbzini tuturdu, o həm də nəbzi idarə edə bilirdi.
Mən də onunla işləmişəm, yanında təcrübə qazanmışam. Komendant saatlarının qadağası üzündən gecələri nəşriyyat dəhlizlərində birlikdə keçirmişik. Cəbhə bölgələrində gözlərimiz qəhrəmanlıq da, ölüm də görüb…
Şərif Kərimlinin yazar kimliyi haqqında ən etibarlı mənbələr onun araşdırma yazıları, ictimai-siyasi publisistikası, sənədli bədii əsərləridir. O, reportyor, publisist, qəzetçi-yazar kimi zamanında məşhurluğun nə olduğunu görən, amma bundan zərrəcə sui-istifadə etməyən ustad qələm adamıdır. Onun publisistikası mövzusuna, xarakterinə görə bütünlüklə milli, ictimai və mətn texnologiyası etibarilə fərqli mahiyyətə malikdir. Onun yazılarında həm mənbəli xəbər, həm fakt, həm analitik münasibət, həm də bədii təsvir vasitələri iç-içə təzahür edir. Elə bu da Şərif müəllimin publisist kimi orijinallığıdır – “Ötən illərin harayı” adlı dördcildliyi və “8712 nömrəli əsir”, “Gürcüstan: ikili standart siyasətinin yeni qurbanı” kimi.
Akademik Nizami Cəfərov “O yaşadıqlarından danışır…” adlı məqaləsində Şərif Kərimlini konkret faktlarla əsl ziyalı kimi xarakterizə edib. İctimai-siyasi hadisələrə heç vaxt birtərəfli şəkildə yanaşmadığını, həmişə problemi tam aydınlığı ilə cəmiyyətə təqdim etdiyini vurğulayıb. “Azərbaycan” qəzetinin ilk baş redaktoru, Xalq şairi Sabir Rüstəmxanlı da onun haqqında qədirbilən və təqdiredici fikirlərini səmimiyyətlə yazıb. Onun Azərbaycan–Gürcüstan dostluğu ideyasını təkcə bu iki ölkənin mətbuatında deyil, eyni zamanda dünyada tanınmış, nüfuzlu, “Novoe russkoe slovo” (ABŞ), “Nezavisimaya qazeta” (Rusiya), “İslami Birlik” (İran), “Sabah” (Turkiyə) kimi qəzetlərdə təbliğ etdiyini göstərib…
Şərif Kərimli idman jurnalisti deyil, amma çağdaş dövrümüzdə el pəhləvanlarından yazan usta yazıçı-publisistdir. “Rəşid Pəhləvan”, “Sali Süleyman”, “Pəhləvan Müsəllim”, “Pəhləvanın taleyi” (Məhəmmədəli Qazaxlı haqqında) kimi əsərləri bunu deyir.
Onun digər yazılarına da doğulduğu yurdun torpağının ətri, insanlarının comərd həyatının ritmi-yaşantısı, təbiətinin rəngi-səfası hopub. “Böyük fəlakətin astanasında”, “Bakıdan Borçalıya nə yaxınmış”, “Bir köç qayıdır geri”, “İflasa uğramış siyasət və gerçəklik”, “Hara gedirsən, ay evi yıxılmış?!”, “Mən qurban verildim”, “Borçalı agrıları”, “Gül verdik, güllə aldıq”, “Borçalıdan Bakıya bir köç gəlir – qaytarmalıyıq!..”, “İtirilən nəslin harayı” əsərləri günün, insan qayğılarının termoanalizi kimidir.
O, 1989-cu ildə qeydiyyatdan keçirdiyi “Borçalı”, 1992-ci ildə təsisçisi olduğu “Sabah” qəzetlərində şovinizmi cəsarətlə qamçılayıb. Gürcüstanda millətçi şovinist qrupların içində katalizator rolunda çıxış edən ermənilərə qarşı mətbuatda etiraz səsini qaldıranlardan biri olub. Redaktoru olduğu “Azərbaycan” qəzetində daim Borçalı haqqında silsilə materiallar, vətəndaş məktubları, siyasi icmallar əksini tapıb. Borçalı əsilli ziyalılarla birgə səyləri “Borçalı” cəmiyyətinin yaranmasına gətirib çıxarıb. Bu gün Şərif müəllim “Borçalı” İB-nin sədridir.
Şərif Kərimli jurnalistikanın tədrisi ilə də məşğul olub. 10 ildən artıq pedaqoji fəaliyyət göstərib, gənclərə müasir jurnalistika məsələlərindən dərs verib. Hazırda isə Azərbaycan Respublikası Əqli Mülkiyyət Agentliyinin “Əqli Mülkiyyət” jurnalının ədəbi redaktorudur. Bu sistemdə işlədiyi son 5 ildə “Azərbaycan milli musiqi alətlərinin patentlə mühafizəsi”, “Azərbaycan brendləri”, “Haaqa sistemi” adlı elmi-praktik kitablar nəşr etdirib.
70 yaşında da şövqlə çalışan, yazmaqdan zövq alan yazara daha böyük yaradıcılıq sevincləri arzulayırıq.
Dəyanət OSMANLI,
şair-publisist