Təbrizdə bir qrup ətraf mühit fəalı İran hökuməti tərəfindən Urmu gölünün qurudulmasına etirazlarını plakatlarla nümayiş etdiriblər.
Son illər ətraf mühit fəalları, Azərbaycan milli hərəkatının fəalları Urmu gölünün quruması fəlakətinin fəsadları barədə insanları maarifləndirməyə çalışıb və hakimiyyətə xəbərdarlıq etməklə yanaşı, Urmu gölünün dirçəldilməsini tələb ediblər. İran hökuməti isə Urmu gölünün bərpası tələblərinə qarşı Azərbaycan xalqının repressiya siyasətini davam etdirir.
Ekoloji ekspertlərin fikrincə, Urmu gölünün quruması bu ərazinin 14 milyondan çox sakininin həyatını təhlükəyə atır və bölgə sakinlərinin məcburi köçünə səbəb olacaq.
Urmu gölünün quruması və toz mərkəzlərinin aktivləşməsi nəticəsində yaranan duz fırtınalarının baş verməsi təkcə bölgə əhalisi və İran ölkəsi üçün yox, həm də beynəlxalq ekoloji təhlükədir.